“Liu e Aoga Tuatea moui mai”

Ponatakiaga he tau fanau Tuatea 1970 – 1980.

Tohi e Showena Lolohea Tanaki Aue - Takitaki he Matakau tau fanau 70 kehe 80 Tau.

Liuaki kia tua e lilifu mo e fakahekeaga ke he matua he lagi ha ko e haana a takitakiaga mafola kua liliu ke feleveia.

Manatu ke tuku atu e tau Fakaaue lahi mahaki kia tautolu oti, Komiti Gahua,lautolu mai he tau motu kehe, I fafo he maaga pihia mo mautolu ne toe hifo ke he maaga Fineone Hakupu Atua, tau mamatua tau lafu pihia ke he FonoTakitaki maaga he maaga ke he fakaaogaaga he hall ka e mua atu ha ko e fakamooliaga he matagahua nai ko e Ponatakiaga he tau fanau Tuatea ne fanau he tau 70 – 80.

Ko e fekau nai ne tamata ai ke he ua mo e hafa e tau tau kua mole atu, mo e fakailoa ai ke he tau fanau ne putoia ke he tau 1970 ke he 1980. Ko e tau fakatutalaaga he Komiti Gahua ne taute ni faka online, Pete ni he toko gahoa a mautolu ne fakamooli ke he fekau mahuiga nai, fakahoko agaia ni e mautolu mo e kua kitia kiai e fulufuluola mo e fiafia e tau fanau katoa moe falu he tau mamatua.

Ko e kakano uho he Taonaga nai ke liu feleveia a mautolu ne oatu ke he aoga Tuatea ke he tau 1970-1980 mo e tau faiaoga ne oatu ke he aoga Tuatea nakai ni kehe vaha ha mautolu ka e tali mai he kamata e aogaTuatea 1920. Lahi e momoko ha kua tokogahoa a lautolu ne toe hifo ke he motu, ka e matalahi mo e fiafia e tau loto ha kua maeke ke liu feleveia auloa ai mo lautolu ne kua talia mo e fakamooli ai.

Pehe nai ha mautolu a fakaholoaga ma e faahi tapu kua mole.

Ko e afiafi Gofua 12 ia Iuni he mole atu e aho Fakatata he maaga ne kamata ai e fakaholoaga he ke he fonua na I Tuatea ke he taha fakaakoaga lalaga mo e talanoa mo lautolu ne fenoga mai pauaki ke lata ia mo e fekau nai tuga ni ne kua tamata ai ke he ua mo e hafa e tau tau kua mole.

Afiafi Tuloto mo e matutaki ai ke he tau tala Tufakaholo mai he tau Tupuna, tau mamatua gahoa pihia foki mo ia ne finatu he aoga nai ne fanau 1965 ne fakafita ke he tauteaga ia mo e lahi e fiafia he logona e tau talahauaga mai ia lautolu e tau mamatua ne oatu ke he aoga nai ko Tuatea mo e ha lautolu a tau momoui fakaaako mua atu ke he tau mena mahuiga ne manatu mo e taute e lautolu pihia foki mo e tau faiaoga ne fakaako ke he tau vaha ha lautolu. Manatu au mahuiga lahi e tau fakamatalaaga nai ma e iloaaga he atuhau ka e nakai maeke he tokologa ke fakalataha age ha ko e tau lavelave.

Ko e afiafi Faiumu 17 Iuni ne fakahoko ai e aho pauaki ha mautolu ke he fale tolo he maaga ke he matahola 4 he afiafi mo e kitia ki ai e tokologa ia mautolu kua tui ai ke he fakataha tapulu miti lanumame (pink) ko e lanu ne tui he tau fanau fifine ke he aoga na.Fuafua ko e molea e 50 he tau tagata mo e 25 e tau fanau ne putoia ke he fekau nai fakalataha foki mo e falu kua fiafia mo e lagomatai fakalahi mai ke he fekau nai. Kua fakamatapatu ai he Komiti gahua mo lautolu mai he tau motu kehe, mai I fafo he maaga mo e lautolu ne toe hifo ke he maaga. Ouetulou!

Afagi ai he Akoako Rev Bazinet Viviani ke he liogi.

Uhu ai foki e lologo ne fati pauaki ke lata ia mo e aho ne fati e Pepe Liutose katoa foki mo e fakamanatuaga he tau lologo tuai ne kua liu fakakite foki ke he afiafi na mai ia mautolu ne manatu agaia. Tau fakamatalaaga mai ia lautolu kua fifili pihia mo e afagiaaga kia lautolu ne manako ke fai kupu mo e kai auloa ai ke he tau kai loga mo e manogi pihia ke he koli palagi kua fiafia ai e tau fanau70-80 ke he afiafi na.

Ko e AhoTapu ne fakalataha fakahiku ai falu ia mautolu ke he Tapuakiaaga ke he Kanana He Fakaalofanoa mo e fai kotofa kua foaki mai ke lata ia mo e matakau. Fakaoti mo e mafola e tau gahua ma e Taonaga nai ke he talahauaga ne pehe, Ko e Kamataaga a nai ke he amanakiaga atu ke he 100 Tau he fakatu e aogaTuatea 2020.

To lahi e fiafia mo e fakaaue foki ke he Atua ha kua tumau e kau falalataha ia ke he maaga pete ni he tokologa ne nakai hohoko mai ha kua lavelave, kua eke ni a mautolu mo tau hukui ma mautolu otike tuku atu e tau manatu fakaaue lahi mahaki ke hake ke pa he lagimo e hifo ke pu ki lalo fonua. Kia tutagaloa e fakaalofa noa he Atua ki luga ia tautolu oti to liliu ke feleveia ke he 2020 ke lata mo e 100 tau. Iehova ke he tau vahaloto!

Ko e Komitigahua ma e Taonaga nai:

Takitaki:Showena Lolohea Tanaki Aue

HagaiTakitaki: Pepe Liutose

TohiKupu: PatlinSiligi

HagaiTohikupu: LangaTalagi

LevekiTupe: FulumoaMautama

HagaiTohiKupu: CrisbinaKonelio