Niue Language Week

Fakamanatuaga 39 Tau he Tu Tokotaha a Tuvalu -Ua e faahi tapu kua mole ne fakahoko ai e taha Faahi Tapu Vagahau Tuvalu, ti fakaoti aki e fakamanatuaga he Tu Tokotaha a Tuvalu. Ha kua tokologa e tau matakainaga mai he motu ko Tuvalu ne kua ha ha iai ke he motu, ne nonofo he maaga tote ko Vaiea, manatu ai ke tohi ai e taha tala pete ni he ku, hagaao ia ke he ha lautolu a fakamanatuaga 39 e Tau he Tu Tokotaha ai e motu ko Tuvalu. Ne fakalataha atu ai e Etitoa he Niue Star mo e magafaoa mo e mamata ai ke he ha lautolu a tauteaga ke he tau fiafia Faka Motu. Kitia ki ai e mokoina he tau matakainaga mai he motu ko Tuvalu ke he ha lautolu a tau Aga Fakamotu, mua atu ke he tau koli mo e tau lologo. Ko e fitu e motu ne kua kaufakalataha ki ai, he mole atu e tau Fono, ti kamata e tau fakafiafia tuga ko e mena fetoko a lautolu ki ai, mai he motu ko Funafuti, Nukulaelae, Nukufetau, Laeva, Nanumea, ka e ko e lahi he tau matakainaga Tuvalu ne nonofo ki Niue, mai he motu ko Niutao, ka kua nakai fakalataha ha kua ha ha i ai e tau lavelave ha ko e tau mauku, mauhoana mo e veveu ulu maka. Ka kua kitia ki ai foki e lahi he mokoina he tau fanau fuata he motu Tuvalu ha lautolu a tau aga fakamotu, ti to lahi e nava ha kua pihia ha lautolu a kitiaaga mo e mokoina ke he ha lautolu a tau vagahau, tau koli mo e tau lologo. 43 Tau he Pule Fakamotu a Niue - Ke felauaki mo e fakamanatuaga 43 Tau he Pule Fakamotu ai a Niue, ne hafagi ai ha lautolu a Faahi Tapu Vagahau Niue ke he fale Museum i Okalana he faahi tapu kua mole, Aho Faiumu 13 Oketopa 2017, ne liogi fakamonuina ai he Faifeau Tomasi Kauie he matahola 5 he afiafi,mo e ha iai e fakaholoaga ke he Takalo mo e falu a lologo. Ti ha ha iai foki e falu a fakatokatokaaga nakai maama mitaki ke he tagata Tohi Tala he Fetu Niue, ka e iloa ki ai to fakaoti aki e Futi Matini tuga ne fa mahani a lautolu ke taute he tau tau taki taha, ke he fonua ko Nga Tapuwae mo e taha fakapotopotoaga ne fa mahani ke taute ai he matakau NAC, he tau Niue ne nonofo takai i Okalana po ko Niu Silani. Kua amanaki e Etitoa he Niue Star, ko ia foki ko e Ekepule he Maaga Hakupu Atua, ke fakalataha atu ke he taha he tau fakafetuiaga nei ke he Aho Faiumu, ka e manatu ke tuku atu e tau Fakamonuina ke he tau tagata oti he motu ko Niue, Niu Silani po ko Ausetalia, ke monuina e Fakamanatuaga 43 Tau he Pule Fakamotu ha Niue Fekai!


Featured Posts
Posts are coming soon
Stay tuned...
Recent Posts
Archive
Search By Tags
No tags yet.
Follow Us
  • Facebook Basic Square
  • Twitter Basic Square
  • Google+ Basic Square