FETOKO AHO KE UA AKI MATAKAU FANAFANA...
Fakalofa lahi atu kia tautolu kua matutaki mai tau tala moe tau ata mai he matakau he motu ne fetoko kehe CG i Gold Coast he tau magaaho nai.
Ko e aho nai ne kua fetoko ai e toko fa a lautolu he matakau fanafana. Ko lautolu ia ko clayton Viliamu, Isatose Talagi pihia moe tokoua a laua fanau fifine ne kua kamata ha laua tau fana fetoko he aho Lotu kua mole. Aho nai ne hoko atu ai e tagata tohi tala poki ata moe kitia ai e tau fana fetoko ha Isa mo Clayton mo e kitia e ha laua tau maka nakai ke he lahi mai lautolu tau motu lalahi he lalolagi.
Ko Clayton ne vihu a ia moe tokoua e tau motu kehe fiha launi mo e amanaki haana fana ti malona mo e taofi ai he tagata ne lefeli mo e fakaata ai ke moua mai taha fana foou ke fakaaoga. Ti haha i ai e tau tagata ne fa taute tau fana ka malona pihia ti kua taute tuai ke lata mo e pogi.Magaaho ia ne kamata ai haana fana ke lekua ha kua kehe e fana ne fakaaoga moe to hifo ai haana ola.
Ko e fana ha Isatose ne nakai mamao lahi tau ola mo lautolu ne mua mo e hoko tokoua laua kehe launi fakahiku a pogi. Ke iloa foki e tautolu ko Isa Talagi foki ne moua taha pine Siliva he taha fetoko he lalolagi he tau kua mole he fetoko World Master.
Kae kua fakaosi he aho nai e tau fana fetoko ha Talo mo Kirsty moe pehe mai a laua koe haia ni ha laua malolo. Ko laua e tokoua tau fanafana taane ko Talaititama Talaiti mo Morgan Talitama kua osi tuai ha laua ti hanai kua amanaki ke toka e motu nai he aho faiumu a pogipogi ke oatu ai ki Okalana ke liliu atu kehe motu he Aho Lotu ha Niu Silani he faahi tapu kahau. Mafola ha laua tau fetoko koe hoko kehe faoa toko hogofulumaua ke fetoko sivi. Pete ni nakai hoko atu laua kehe faoa toko ono ke he siviaga fakahiku kae mafola ha laua tau fetoko.
Ko e falu he matakau kua fita foki he toka e maaga ne nonofo ai kae laulahi kua amanaki ke oatu kehe taha fonoaga he matakau tau Niue he tau maaga nai ko Gold Coast pihia mo Brisbane ke lata mo e tau matutakiaga ha Niue i Niue mo e tau tagata feua sipote ne nonofo he motu nai.
To fakaosi ai mo e kai faka mavehe he tau matakainaga Niue he tau maaga nai i Queensland.
Monuina mai he Atua.
