Mahuiga Agaia e Aho Tapu Tau Fanau ?

Ke tali mai he kamataaga poke lima hogofulu mo e molea e tau tau kua mole ko e aho tapu tau fanau kua holo ki mua e mahuiga kehe tau magafaoa osi. Ko e tapu pogipogi he maaga Hakupu Atua ko e na fakahoko tumau kehe tau sapati osi, kae kaeke koe aho Tapu fanau kua nakai fakahoko. Ko e kakano lahi ni ha kua aala tuai e tau mamatua ke tafu he tau umu ke tao e tau kai ke lata mo e tau fanau ka hili e tapu.

Mo e lafi ki ai to ta tuai e tapu he magaaho la he kavi matahola hiva ha i loto he Faituga ke lata ia mo e tau lauga poke tau tala ka taute faka kaina poke faka aoga Aho tapu. Ke he tau tau osi ne fa hikihiki fano ke taute ni tau mamatua yau lauga poke taute tau faiaoga Aoga Aho Tapu poke faka kaina. Tau nai kehe maaga Hakupu ne taute faka vahega.

Taha e mena fuluola foki tau aho pehe nai ko e omai poke oatu falu tau fanau he maaga ne nonofo kehe falu a maaga mo e talahau ha lautolu a tau lauga ti kitia ia he mahuiga he tau maaga kia lautolu kua nonofo ke he falu a maaga. Ko e falu a tagata foki ne fa mahani ke nakai oatu tau tapuakiaga kua mamatike tai ke oatu ke kitia mo e logona e leo he tama poke mokopuna ka lauga mai i mua.

Ne taha e matua tupuna ne hake ki mua mo e totou mai talefoni uta fano e lauga haana tama ne kua nakai nofo kehe motu, kua totou kae tagi aina he momoko ia mokopuna kua nakai nofo he motu he aho Tapu Fanau. Pihia e fulufuluola he Aho Tapu Fanau he motu ha tautolu. Taha ne vala ne kua nakai taute he tau mamatua he magahala nai ko e tuki foutu aki e keli e tau fanau ka nakai totou e tau lauga, ha koe vaha nai kua fakahala tuai e matua ka keli e tama. Ko e huhu he mataulu tala koe mahuiga agaia nakai e Aho tapu Tau Fanau...ko tali holo ki mua e mahuiga.