To Nakai Nimo Tukulagi - Fineone Hakupu Atua 2018
Ke felauaki mo e fakamanatuaga Aho Kautau 2018 ha Niu Silani,ne fakahoko ai foki ha Fineone Hakupu Atua a fakamanatuaga nei he matafatafa ata he aho 24 Apelila 2018, ki mua he Maka Kautau he Maaga. Ko e gutu vagahau mae fakaholoaga, Mr Fapoi Akesi, ne hafagi e fakaholoaga he pogipogi.
Kua fakalataha mai foki e tau hologa he tutupu mai he taha matua Kautau ko Corporal Sionesini, ko e tau fanau tupuna ha Sipeligi Gahuatama, ko e tau fanau ha Anesita Gahuatama mo Lafetu Sipeli. Fakamatala ai a Nogotautama Sipeli, ko e kautau kua okioki mai mo e gahua kautau, mo e haana fakamatalaaga, nakai fakaohooho e ia tau fanau ke o ke eke mo kautau, ha ko e fano he ha felakutaki nakai ko e mena mitak he haana kitiaaga. Fakamatala faka Niue a ia, si lahi e matalahi he fanogonogo atu ke he, haana fakamatalaaga, ha ko ia fanau mo e tupuhake ke he motu ko Niu Silani.
Ko e fakamonuinaaga mae pogipogi ne taute ai he akoako he maaga Rev Arthur Pihigia ko e fakamanatu aho kautau fakamua a nai ha laua he nonofo mai ke he maaga. Taha mena mahuiiga foki ne liogi e ia e liogi ne taute ai taha Akoako he magaaho ne fakatoka ai e fenoga tau tupuna ha tautolu.
Falu fakamatalaaga mai ia he Ekepule Motu, Lilifu Crossley Tatui, mo e haana talahauaga, ai iloa mena ko ia e matua ne hoko e mena nei ke he haana tau fanau, to loto malolo nakai a laua mo e haana tokoua ke fakatoka e tau fanau ke o ke he felakutaki he ha felakutaki, ke muitua atu ke he tau tupuna ha maaga ne tukulele e tau momoui ma e mafola ma tautolu he vaha nei. Ko e Ekepule maaga, Lilifu Michael Jackson, mo e haana fakamatalaaga ha ko e haana tupuna ko Elone,ne manatu e ia tau taute kautau he matua ne tui, ka e nakai iloa he magaaho fakamui kua toka ki fe. Fakaoti fakamatala ai e Hagai Ulumotua ko Robert Jackson. To tuku ai e tau kau fiti lakau, ne totou ai he matua fifine Taumalua Jackson taha alaga tala (Poem) fakapapalagi hagaao ke he Anzac.
Futi ai he tau fanau Boys Brigade mo e Girls Brigade e tau matini ne tolu ha Ausetalia, Niu Silani mo Niue, ka e momoko ha kua nakai kitia e tokaaga he matini he Maaga, ka e moha ia fakahoko ni e lologo futi matini he maaga.
Ko e Last Call, ne ulo ai he patu fuata ko William Liuvaie, mo e tauhea ai e Moses Mautama e tau higoa ha lautolu ne tohia ke he lapa maka. Fakaoti e fakaholoaga ke he kai pogipogi he fale akoako, ne tauteute ai he Ekepule he Maaga, Ekalesia, mo e Fono Takitaki Maaga mo e falu he tau matakainaga he Maaga.
To Nakai Nimo Tukulagi he Atuhau ha Fineone Hakupu Atua e tau Tupuna ne kua tukulele e tau momoui ma e Mafola.