Fusi e Masini 44 Tau Pule Fakamotu ke he Kaina Foou Tau Taoga Niue

Na fa mahani ni e fusiaga he masini he kautu ke lata mo e fakamanatuaga he aho Pule Fakamotu he tau tau kie faka hoko ki mua he Fale Fono ha tautolu kae ko e tau nau kua fai hikiaga fakatose ke taute ai kehe kaina foou he Fale Tau Taoga Niue ne kua talaga foou ai ke he vala fonua na i luga he aoga Halamahaga.

Ha kua pa e aoga nai he magaaho ne hoko mai ai e afa ko Heta he tau 2004 mo e hoko mai e tau peau ke tata mai kehe fonua aoga mo e fai fakatokaaga ai e Fakatufono he magaaho na ke hiki e aoga ke talaga kehe fonua na i Paliati tuga ku a toka ai magaaho nai. Fakaue kehe tau fakatufono Ausetalia mo Niu Silani kua lagomatai e tau tupe ke talaga aki e aoga ti matutaki foki ke talaga e taha kaina mae Tau Toga Niue.

Fai magaaho e lali e tau Fakatufono kua mole atu ti pihia kehe Fakatufono he magaaho naike taute e taha kaina pauaki mae Tau Taoga Niue. Tali mai he magaaho ne tamata ai e faahi gahua ia mo e fakatu e komiti he tau 2003. Omoi lahi foki Takitaki ha Niu Silani ko Helen Clark he magahala ia, mena ia ne moua e ia e taha higoa haana age tau mamatua fifine ko “Aunty Helen”.

Ko e aho Fusi matini he tau nai kua nakai mahuiga lahi ka fakatatai atu kehe hafagiaga he Fale Taoga Niue. Lafi ki ai kua fai kehe lahi e fusi matini he tau nai ha kua kua e pou, ne tautau ai, lafi ki ai e kua nakai fusi foki e masini ha Niu Silani tuga ne taute ke kamata mai he atu 1974 ke hoko mai kehe tau kua mole. Ko e fifiliaga ia ko e taute ni he Lilifu Palemia SirToke Tufukia Talagi KNZM.

Tuga he tau tau ne kua hataki he matakau ne fakatokatoka e fakaholoaga mae aho e tau uiina osi ke hohoko atu ke nonofo to ta e matahola hafa he mole matahola ua he pale la. Ko e aho Falaile a ia Aho 19 Oketopa 2018. Ko e kaina foou he Taoga Niue haia he matakavi tonu he Aoga Fakamahani tuai he Aoga Fanau Ikiiki i Halamahaga.

Ko e tau lilifu kua nonofpo fakapapahi kehe fale foou mo e nonofo mai e tau Iki Lilifu mai luga. Haia foki e matakavi ne nonofo ai e tau tagata mai tau maaga ti ki lalo he kaupa tuai he aoga ia ne toka ai e Galue Fafau ko e tauteaga ke fakamatapatu aki e Taoga Niue. Tamai he tau tagata tau koloa he fonua kae foaki he Fakatufono e tau kai ke kina aki.

Nakai omai e tau Ikipule he tau peleoafi takitaha ke hohopo ki mua kae oa auloa ni moe tau uiina ke nonofo mo e leo atu kehe hoko maiaga he matua Palemia mo e haana Iki Fifine Dame Fifita Talagi. Ko e hukui ha Niu Silani kua nakai hau kehe foki moe kua nakai fai magaaho ke fakamatala ai tuga fa mahani ti mua atu kua nakai fusi e masinoi ha Niu Silani. To moua he taha tala kehe e tau fakamaamaaga kehe hikiaga lahi nai.

To lahi e ku mo e holo mitaki e fekau ha kua nakai molea e tula he kamata mai he hoko mai e Palemia fusi e masini ha Niue moe taute Pelesiteni EKN Rev Vili Kamupala e tapuakiaga hafagi, fakaholo e hafagiaga Fale Taoga Niue ti ohifo mai osi kehe male he aoga kehe tau fale la lalahi kua fakatoka ai e tau kai loga, tau inu loga mo e kehekehe ti taumafa ai e tokologa ke kamata mai tau Iki he motu ke pihia tau fanau ikiiki.

Ne nakai fai fono foki mo e nakai toho loa ha kua iloa e tautolu ko e pouli hane mamalu mai. Ko e tau fakafiafia kua kamata mai he tau fai aoga he Aoga Fanau Ikiiki mo e logona ai e tau lologo tuai, tuga ne fasi taha pulotu Sale Tusini ti pihia mo Taso Tukuniu he lologo ne fasi ai ke fakaulu aki e aoga Halamahaga he magahala ne talaga ai he tau tau 1960.

Ko e matakau koli he aoga Koli ha Koli mai A ne takitaki ai e Robin Hekau moe fulufuluola ha ia ha lautolu a tau koli, tau fanau lalahi ti pihia tau fanau ikiiki kua manehenehe ha lautolu a tau fakafiafia. Kua hoko e magaaho kua inu tahi e la ti pihia e tokologa kua inu mo e fiafia he tau vai mamali mo e kua oatu kehe tau maaga mo e tau kaina kua mafola tau fenoga.

Tukuatu e tau fakaue lahi kehe tau tagata gahua ke fakatokatoka e tau fakahologa mae aho ti pihia kehe vaha tapu katoa. Kia amanaki ke mafola ke hohpoko atu ke he tau fiafia Fusi Masinoi 45 aki he tau ka hau 2019.

Tohi: N.Jackson


Featured Posts
Posts are coming soon
Stay tuned...
Recent Posts
Archive
Search By Tags
No tags yet.
Follow Us
  • Facebook Basic Square
  • Twitter Basic Square
  • Google+ Basic Square